我要習慣吓。。。
各位，我唔會立即離開FB，
我想等埋大部朋友都移民那裡。
任何時候，我唔想突然掉低一啲人。
老實講，我真係好唔捨得FB。
就好似一個你一直好愛嘅人，見住佢漸漸變質，
到有一日，雖然係自己頂唔順放手，
但想起佢都會痛。
我試過一啲感情都係咁。
係好唔捨得，
諗返起以前喺埋一齊的開心嘢、傷心嘢，
都仲有感覺，而且係當時一樣咁強烈，時間沒有令呢啲感覺退色 -
諗起啲 sweet 嘢個心仲係甜絲絲，
諗起啲傷心嘢仲係會禁不住流眼淚。
咁仲係唔係愛呢？
可能係㗎，但愛嘅係以前嘅我哋，
而唔係今時今日嘅佢。
好多嘢，做咗講咗傷害咗，係返唔到轉頭。
好懷念以前嘅我哋，但已經再無法同眼前嘅佢相處，
講多兩句，深入少少都說不下去，想立即轉身走。
咁代唔代表會好容易鍾意下一位？
其實唔會，感情係時間建立嘅，
一見鍾情呢啲係極罕，
我唔覺得咁容易投入另一段，
尤其當之前嗰段咁深刻。
所以，雖然今日唔愛，將來唔愛，
但可能係一生最愛。
我 2010年就開FB Page，10年，
我今日上去睇一睇，原來我喺 FB 有9萬7千 Likes, 13萬Followers。
所以都要感謝FB 咁多年嘅建立，
俾一個好好嘅平台我去發揮，
喺嗰度建立咗自己的一個介面，
我甚至喺同FB一齊成長中發現自己，
擁有好多好多珍貴回憶。
唔知當我哋唔用Facebook，
FB 仲會唔會留住啲帳戶，
咁以後當我唔係用緊自己網絡時，
偷偷地用另一個新開帳戶，
上去睇返梁芷珊以前啲嘢㗎？
又或者，間中去望吓佢同佢啲新朋友玩緊啲咩嘢，
有無變得同佢啲新朋友一樣咁嘅格局，
佢會後悔趕走我哋（但係又keep 住我哋啲嘢），
定係佢更如魚得水？
對於舊情，我係睇得比較重，
行為上我唔會婆婆媽媽，
但心底感受好深，
可以為一段情傷好耐。
當我睇住佢去 please 人，而對方從來都對佢唔好，
我會心痛，真係值得咩？
為咗利益？利益你已經有好多啦，需要咁樣去求存咩？
我睇住佢變得做事唔公充，愈來愈愛用歪理解脫；
每天放棄多一些，佢原本珍視的價值，
直至，佢自己成為了自己原本最討厭的人。。。
點解佢會咁傻？定係，其實係我傻？、
無論係前者定後者，呢件事都係一件事，
10年，13萬 Followers,
一個月170萬次瀏灠，50%嘅 engagement rate，
走了，雙方都失去咗一啲嘢。
我真係要放低呢度？
情況就好似諗要唔要離開香港一樣，
點解會變成咁，真係我哋要走？
而唔係另一邊啲人走？
Are you sure? Am I sure?
諗唔到，暫時唔諗。
Search